ແຫຼ່ງທ່ອງທ່ຽວ

 1 ອ່າງນ້ຳຕຽນ. (ແຂວງໄຊຍະບູລີ)

ອ່າງນ້ຳຕຽນ ຕັ້ງຢູ່ບ້ານໂນນສະຫວັນ ເຊິ່ງຫ່າງຈາກຕົວເມືອງໄຊຍະບູລີ ໄປທາງທິດໃຕ້ປະມານ 6 ກິໂລ ແມັດ. ການເຂົ້າເຖິງແມ່ນມີເສັ້ນທາງລົດ ໄປຫາອ່າງນ້ຳຕຽນ ມີຄວາມສະດວກສະບາຍ, ໃຊ້ເວລາປະມານ 15 ນາທີ. ປະຫວັດຄວາມເປັນມາ ອ່າງນ້ຳຕຽນ ໄດ້ຖືກກໍ່ສ້າງໃນປີ 1999 ແລະ ເປີດນຳໃຊ້ ປີ 2002. ລັກສະນະຂອງອ່າງ ເປັນອ່າງເກັບນ້ຳ ເພື່ອສະໜອງນ້ຳໃຫ້ແກ່ການຜະລິດກະສິກຳ. ຢູ່ບໍລິເວນອ່າງນ້ຳຕຽນ ຍັງມີຮອຍພະບາດ ແລະ ທິວທັດທຳມະຊາດທີ່ງົດງາມ ເໝາະແກ່ການພັກຜ່ອນຢ່ອນໃຈ. ສະນັ້ນ, ມັນຈຶ່ງຖືກພັດທະນາ ໃຫ້ເປັນສະຖານທີ່ທ່ອງທ່ຽວ ເຊິ່ງມີສິ່ງຮອງຮັບສຳລັບ ນັກທ່ອງທ່ຽວເຊັ່ນ: ຮ້ານອາຫານ, ເຮືອບໍລິການນຳທ່ຽວ. ນອກຈາກນີ້ແລ້ວ, ຢູ່ບໍລິເວນດັ່ງກ່າວ ຍັງມີສູນອະນຸລັກຊ້າງ ສຳລັບນັກທ່ອງທ່ຽວທີ່ສົນໃຈ ໃນການຂີ່ຊ້າງ ຫຼື ສຶກສາຂໍ້ມູນກ່ຽວກັບຊ້າງອີກດ້ວຍ.

2 ນ້ຳຕົກຕາດຮຳ. (ແຂວງໄຊຍະບູລີ)

​ນ້ຳຕົກຕາດຮຳ ຕັ້ງຢູ່ບ້ານເມືອງຮຳ, ເມືອງບໍ່ແຕນ, ເຊິ່ງຫ່າງຈາກເທດສະບານເມືອງບໍ່ແຕນ ປະມານ 5 ກິໂລແມັດ, ມີເສັ້ນທາງລົດໄປຫາ ນ້ຳຕົກຕາດຮຳ ສາມາດໄປໄດ້ທັງສອງລະດູ. ຕາມເລື່ອງເລົ່າມາແຕ່ບູຮານນະການວ່າ: ແຕ່ກີ້ແຕ່ກ່ອນ ມີເມືອງໜຶ່ງຊື່ວ່າ: “ເມືອງທ່າໂຮງ”; ເຊິ່ງມີໜອງນ້ຳໃຫຍ່ແຫ່ງໜຶ່ງ ທີ່ມີຕົ້ນໄມ້ໄຜ່ລຽນອ້ອມຈອດກັນ ເອີ້ນວ່າ: “ໜອງໄຜ່ລ້ອມ” (ປະຈຸບັນກໍຍັງມີຊື່ວ່າ “ໜອງໄຜ່ລ້ອມ”) ເຊິ່ງເປັນທີ່ຢູ່ ອາໄສຂອງເງືອກໂຕໜຶ່ງ. ມື້ໜຶ່ງ, ເງືອກໂຕນັ້ນ ໄດ້ປອມໂຕເປັນກະປູ ແລ້ວໄປຄາບຕີນລູກສາວພະຍາ ທີ່ກຳລັງຕ່ຳຫູກຢູ່ກ້ອງລ່າງເຮືອນ ແລ້ວນໍາເອົານາງ ລົງໄປທ່ານ້ຳ (ທ່ານ້ຳແຫ່ງນັ້ນ ຈຶ່ງມີຊື່ວ່າ “ທ່ານາງ” ຈົນເຖິງປະຈຸບັນ). ພະຍາຈຶ່ງໄດ້ແຕ່ງໝໍມົນ ແລະ ເຖົ້າແກ່ຈຳນວນໜຶ່ງ ໄປເຮັດພິທີ ເພື່ອຊອກຫາລູກສາວ, ພວກເຂົາໄດ້ນຳຮອຍຕີນນັ້ນ ໄປຮອດທ່ານ້ຳແຫ່ງໜຶ່ງ (ເອີ້ນວ່າ: “ນ້ຳຮອຍ” ຈົນເຖິງປະຈຸບັນ). 

3 ນ້ຳຕົກຕາດເຈົ້າ. (ແຂວງໄຊຍະບູລີ)

ທີ່ຕັ້ງນ້ຳຕົກຕາດເຈົ້າ ຕັ້ງຢູ່ບ້ານທ່າເດື່ອ, ເຊິ່ງຫ່າງຈາກຕົວເມືອງໄຊຍະບູລີ ໄປທາງທິດເໜືອປະມານ 30 ກິໂລແມັດ. ການເຂົ້າເຖິງ ນ້ຳຕົກຕາດເຈົ້າ ແມ່ນສາມາດເຂົ້າເຖິງດ້ວຍ ເສັ້ນທາງລົດ ແລະ ສາມາດໄປໄດ້ທັງສອງລະດູ. ປະຫວັດຄວາມເປັນມາ ນ້ຳຕົກຕາດເຈົ້າ ແມ່ນສະຖານທີ່ ທີ່ປະຊາຊົນ ຊາວເມືອງໄຊຍະບູລີ ກໍ່ຄືແຂກຕ່າງດ້າວທ້າວຕ່າງແດນ ນິຍົມໄປທ່ຽວຊົມ, ພັກຜ່ອນ ຫຼື ພາກັນມາອາບນ້ຳ ໂດຍມີຄວາມເຊື່ອວ່າ ເມື່ອອາບແລ້ວ ຈະເຮັດໃຫ້ຮ່າງກາຍແຂງແຮງ ແລະ ສະສາງລ້າງສ່ວຍສິ່ງທີ່ບໍ່ດີອອກໄປ. ໃນສະໄໝກ່ອນ ພໍຮອດບຸນກຸດສົງການປີໃໝ່ລາວ ຂອງທຸກໆປີ ເຈົ້າຊີວິດຫຼວງພະບາງ ຈະໃຫ້ຄົນມານຳເອົານ້ຳຢູ່ແຫ່ງນີ້ ໄປຫົດສົງພະບາງ ຢູ່ທີ່ຫຼວງພະບາງ. ລັກສະນະຂອງນ້ຳຕົກ ເປັນນ້ຳຕົກຕາດ ທີ່ມີຄວາມສູງ ປະມານ 12 ແມັດ, ກ້ວາງປະມານ 2 ແມັດ. ຢູ່ບໍລິເວນດັ່ງກ່າວ ແມ່ນຖືກປົກຄຸມໄປດ້ວຍຕົ້ນໄມ້ໃຫຍ່, ຢູ່ຈຸດທີ່ນ້ຳອອກ ມີພະພຸດທະຮູບ ປະດິດສະຖານຢູ່ ເພື່ອໃຫ້ແຂກຄົນທີ່ໄປທ່ຽວຊົມໄດ້ກາບໄຫວ້ບູຊາ. ມີສາລາໃຫ້ນັກທ່ອງທ່ຽວໄດ້ນັ່ງພັກຜ່ອນ ແລະ ສາມາດຫຼຽວເຫັນທິວທັດ ທຳມະຊາດ ທີ່ສວຍງາມ ຂອງແມ່ນ້ຳຂອງ.

4.ເຂດພັນຖ້ຳນ້ຳທັ່ງ. (ແຂວງໄຊຍະບູລີ)

ທີ່ຕັ້ງເຂດພັນຖ້ຳນ້ຳທັ່ງ ຕັ້ງຢູ່ຫ່າງຈາກເທດສະບານເມືອງໄຊຍະບູລີ ໄປທາງທິດໃຕ້ປະມານ 43 ກິໂລແມັດ. ການເຂົ້າເຖິງແມ່ນທ່ານສາມາດ ໄປໄດ້ໂດຍທາງລົດ ຫຼື ເຮືອ. ປະຫວັດຄວາມເປັນມາ ເຂດພັນຖ້ຳນ້ຳທັ່ງ ໄດ້ຮັບການພັດທະນາ ເປັນ ແຫຼ່ງທ່ອງທ່ຽວໃນປີ 2009. ໂດຍໄດ້ຮັບການ ສະໜັບສະໜູນຈາກ ໂຄງການພັດທະນາການທ່ອງທ່ຽວແບບຍືນຍົງ (ADB) ແລະ ໄດ້ເປີດບໍລິການໃນປີ 2011. ລັກສະນະຂອງສະຖານທີ່ ເຂດພັນຖ້ຳນ້ຳທັ່ງ ກວມເອົາ 4 ບ້ານເຊັ່ນ: ບ້ານນາທັງ,ບ້ານແກ້ວ, ບ້ານປາກຮຸ່ງ ແລະ ບ້ານຫ້ວຍແກ້ງ. ກິດຈະກຳການທ່ອງທ່ອງທ່ຽວຢູ່ເຂດນີ້ ແມ່ນການຍ່າງປ່າ, ຊົມຖ້ຳ, ພັກແຮມນຳເຮືອນປະຊາຊົນ, ຮັບປະທານອາຫານພື້ນບ້ານ, ຟັງການຂັບລຳແບບທ້ອງຖິ່ນ, ຍິງໜ້າເກັກ, ລ່ອງເຮືອ.

5 ອ່າງນ້ຳຕຳ. (ແຂວງໄຊຍະບູລີ)

ອ່າງນ້ຳຕຳຕັ້ງ ຢູ່ບ້ານໂຄກກະເບົາ ເມືອງ ແກ່ນທ້າວ ເຊິ່ງຫ່າງຈາກ ຕົວເມືອງແກ່ນທ້າວ ປະມານ 8 ກິໂລ ແມັດ, ນັກທ່ອງທ່ຽວ ສາມາດໄປພັກຜ່ອນ, ຊິມອາຫານ ຢູ່ອ່າງນ້ຳຕຳ ໂດຍໃຊ້ທາງລົດ.ອ່າງນ້ຳຕຳ ແມ່ນອ່າງເກັບນ້ຳຂະໜາດກາງ ເຊິ່ງໄດ້ສ້າງຂຶ້ນ ແລະ ສຳເລັດ ໃນປີ 2000, ມີເນື້ອທີ່ທັງໝົດ 17 ກິໂລແມັດມົນທົນ, ມີລະບົບ ຊົນລະປະທານ ຕອບສະໜອງນ້ຳ ໃຫ້ແກ່ການຜະລິດລະດູນາປີ. ອ່າງນ້ຳຕຳແມ່ນຈຸດໜຶ່ງ ທີ່ມີທິວທັດທຳມະຊາດທີ່ສວຍງາມ, ມີພູຫີນປອກໂລ້ນ ສູງສະຫງ່າງາມຕາ, ມີປ່າໄມ້ສະຫຼັບຊັບຊ້ອນ ຢູ່ບໍລິເວນອ່າງ ເຊິ່ງເໝາະສົມແກ່ການພັກຜ່ອນ ແລະ ການທ່ອງທ່ຽວ. ພາຍໃນບໍລິເວນອ່າງນ້ຳຕຳ ຍັງມີຮ້ານອາຫານ ແລະ ສະຖານທີ່ພັກແຮມ ເພື່ອຮອງຮັບນັກທ່ອງທ່ຽວ. ໃນແຕ່ລະປີ ເມື່ອຮອດບຸນປີໃໝ່ລາວ ກໍ່ໄດ້ຈັດໃຫ້ມີການແຂ່ງຂັນເຮືອຊ່ວງ ປະເພດ 10 ສີພາຍ ແລະ ມີງານມ່ວນຊື່ນສັງສັນ.

6 ຖ້ຳພໍ່ບົວ. (ແຂວງໄຊຍະບູລີ)

ຖ້ຳພໍ່ບົວຕັ້ງຢູ່ບ້ານຂິ່ງ ຫ່າງຈາກເທດສະບານເມືອງຊຽງຮ່ອນ ປະມານ 5 ກິໂລແມັດ, ນັກທ່ອງທ່ຽວສາມາດໄປຊົມ ຖ້ຳພໍ່ບົວດ້ວຍການຂີ່ລົດ. ເປັນເວລາດົນນານມາແລ້ວ ມີພະບົວລຽບປັດສະໂຖ ພ້ອມດ້ວຍສຳມະເນນ 3 ອົງ ຄື: ສຳມະເນນ ອິນເຫຼົາ, ສຳມະເນນຄຳ ແລະ ສຳມະເນນກັນນິຖາ ພາກັນໄປຈຳສິນພາວັນນາຢູ່ໃນປ່າ, ສ່ວນພະບົວລຽບປັດສະໂຖ ໄດ້ຈຳສິນຢູ່ໃນຖ້ຳ.ການທີ່ມີພະສົງໄປຈຳສິນພາວັນນາ ສຶກສາຮ່ຳຮຽນວິໄນສົງຢູ່ເຂດນັ້ນ ກໍເລີຍມີອອກຕົນຍາດໂຍມພາຍໃນບ້ານຂິ່ງ ແລະ ບ້ານຄ້ຳພາກັນມາ ບູລະນະປະຕິສັງຂອນຖ້ຳແຫ່ງນີ້ ດ້ວຍການປຸກສ້າງກຸດຕິ, ກໍ່ພະທາດເຈດີ ແລະ ໄດ້ນຳເອົາພະພຸດທະຮູບໄປປະດິດສະຖານ ເພື່ອສັກກາລະບູຊາ. ບຸນປີໃໝ່ລາວຂອງທຸກໆປີ ປະຊາຊົນໄດ້ພ້ອມພາກັນ ໄປຫົດສົງພະພຸດທະຮູບ ແລະ ເປັນການໄປທ່ຽວຊົມທຳມະຊາດ ທີ່ມີຄວາມສວຍສົດງົດງາມ.

7 ພະທາດຊຽງລົມ. (ແຂວງໄຊຍະບູລີ)

ພະທາດຊຽງລົມຕັ້ງຢູ່ບ້ານທາດ ເຊິ່ງຫ່າງຈາກເທດສະບານເມືອງຊຽງຮ່ອນ ປະມານ 1 ກິໂລແມັດ, ນັກທ່ອງທ່ຽວສາມາດໄປຊົມ ຄວາມງາມຂອງພະທາດຊຽງລົມ ທີ່ມີຄວາມເກົ່າແກ່ ໂດຍການຂີ່ລົດ.ຕາມເຖົ້າແກ່ບູຮານ ເລົ່າສືບຕໍ່ກັນມາວ່າ: ແຕ່ກ່ອນ ມີພະຍາຂາກ່ານ ພ້ອມດ້ວຍເສນາ 4 ຄົນ ໄດ້ເດີນທາງມາແຕ່ເຂດ 12 ພັນນາລື້, ໄດ້ມາພົບເຫັນ ພະທາດຕັ້ງຢູ່ໃນປ່າ ກໍ່ເລີຍພາກັນສັກກາລະບູຊາ ເປັນມິ່ງບ້ານຂວັນເມືອງ. ໃນສະໄໝນັ້ນ ມີຄົນອາໄສຢູ່ ເປັນບ້ານນ້ອຍໆ. ຄຳວ່າ: “ຊຽງລົມ” ມີຄວາມໝາຍວ່າ: “ຊຽງ” ແມ່ນເມືອງ, “ລົມ” ແມ່ນບັນຍາກາດຊຸມເຢັນ ແລະ ຟ້າຝົນຊົນລະທາດີ. ໃນສະໄໝອານາຈັກລາວລ້ານຊ້າງ ຮຸ່ງເຮືອງ ໄດ້ມີການສ້າງວັດວາອາຮາມ ເພື່ອໃຫ້ປະຊາຊົນໄດ້ສັກກາລະບູຊາ ແລະ ເພື່ອເຜີຍແຜ່ສາດສະໜາພຸດ. ພະທາດຊຽງລົມ ຖືກສ້າງຂຶ້ນ ເມື່ອປີ ພ.ສ 1847, ໂດຍຊ່າງຄົນພະມ້າ. ມາຮອດປະຈຸບັນ ພະທາດມີອາຍຸປະມານ 708 ປີ, ພະທາດມີລວງສູງ 27 ແມັດ, ແທ່ນທໍລະນີກວ້າງ 40 ຕາແມັດ. ຄຳວ່າ: ພະທາດຊຽງລົມ ກໍ່ຍ້ອນເຫດຜົນທີ່ວ່າ: ພະທາດຕັ້ງຢູ່ເຂດຊຽງລົມ ເຊິ່ງກວມເອົາ 10 ກວ່າບ້ານ ເປັນຜູ້ມາບົວລະບັດຮັກສາ, ທຸກໆເດືອນ 5 ລາວຂອງແຕ່ລະປີ ປະຊາຊົນກໍ່ຈະພ້ອມພາກັນ ເອົານ້ຳອົບນ້ຳຫອມມາຫົດສົງພະທາດ

8 ພະທາດໝັດຄຳ. (ແຂວງໄຊຍະບູລີ)

ພະທາດໝັດຄຳ ຕັ້ງຢູ່ບ້ານແກ້ວດອນຄູນ ເຊິ່ງຫ່າງຈາກເທດສະບານເມືອງເງິນ ປະມານ 3 ກິໂລແມັດ, ມີເສັ້ນທາງຂຶ້ນຫາພະທາດ, ເຊິ່ງນັກທ່ອງທ່ຽວສາມາດ ຂີ່ລົດ ຫຼື ຍ່າງຂຶ້ນໄປກໍໄດ້.ຕາມການບອກເລົ່າສືບຕໍ່ກັນມາວ່າ: ແຕ່ກ່ອນ ມີພວກມ່ານ (ພະມ້າ) ມາຕັ້ງບ້ານເຮືອນຢູ່ເຂດຫົວທົ່ງຂາມ (ເຂດບ້ານນ້ຳເງິນ ໃນປະຈຸບັນ) ເຊິ່ງຍັງມີຮ່ອງຮອຍທາດ ແລະ ວັດເກົ່າຫຼົງເຫຼືອຢູ່. ພວກມ່ານໄດ້ເຂົ້າໄປໃນປ່າ ແລະ ເຫັນຊ້າງໂຕໜຶ່ງ ທີ່ມີລັກສະນະຜິວພັນເປັນສີເງິນ ຍ່າງເລາະລຽບຕາມແມ່ນ້ຳສາຍໜຶ່ງ (ຕໍ່ມາແມ່ນ້ຳສາຍນັ້ນ ຈິ່ງມີຊື່ວ່າ: “ນ້ຳເງິນ”). ພໍໄປຮອດປາກນ້ຳ, ຊ້າງໂຕນັ້ນພັດຍ່າງໄປຂຶ້ນແມ່ນ້ຳສາຍໃໝ່ (ແມ່ນ້ຳສາຍດັ່ງກ່າວ ຈິ່ງຖືກເອີ້ນວ່າ: “ນ້ຳຍ່າງ”, ແລ້ວປ່ຽນມາເປັນ “ນ້ຳຍາງ” ໃນປະຈຸບັນ).

ຊ້າງໄດ້ຍ່າງຂຶ້ນຕາມແມ່ນ້ຳ ປະມານ 1,000 ວາ (ພັນວາ) ພໍຮອດຮູຖ້ຳ ຊ້າງກໍ່ໄດ້ເຂົ້າຖ້ຳໄປ ແລ້ວດິນກໍ່ໄດ້ເຈື່ອນຖົມຮູຖ້ຳແບບອັດສະຈັນ. ພວກມ່ານ ທີ່ຕິດຕາມຊ້າງໂຕນັ້ນ ກໍ່ພາກັນຂຸດດິນ ເພື່ອຊອກຫາຊ້າງ ແຕ່ກໍ່ບໍ່ເຫັນ, ກົງກັນຂ້າມ ພວກເຂົາເຫັນແຕ່ໂຕໝັດເປັນສີຄຳ ໄຕ່ອອກມາເປັນ ຈຳນວນຫຼວງຫຼາຍ. ເມື່ອເປັນດັ່ງນັ້ນ ພວກເຂົາຈິ່ງພາກັນກໍ່ທາດໃສ່ບໍລິເວນດັ່ງກ່າວ ໃນປີ ຄ.ສ 1576, ແລ້ວໃສ່ຊື່ວ່າ: ພະທາດໝັດຄຳຈົນເຖິງທຸກ ວັນນີ້.

9. ວັດສີບຸນເຮືອງ (ວັດບ້ານໃຫຍ່). (ແຂວງໄຊຍະບູລີ)

ວັດສີບຸນເຮືອງ (ວັດບ້ານໃຫຍ່) ຕັ້ງຢູ່ບ້ານໃຫຍ່ ເຊິ່ງເປັນບ້ານວັດທະນະທຳ, ຕັ້ງຢູ່ເທດສະບານເມືອງໄຊຍະບູລີ. ການເຂົ້າເຖິງ ທ່ານສາມາດ ໄປກາບໄຫວ້ ຫຼື ຊົມຄວາມງາມຂອງວັດສີບຸນເຮືອງ ໄດ້ໂດຍທາງລົດ.

ປະຫວັດຄວາມເປັນມາ ວັດສີບຸນເຮືອງຖືກສ້າງຂຶ້ນໃນປີ 1456. ໃນສະໄໝກ່ອນເປັນວັດທີ່ສ້າງດ້ວຍໄມ້, ໃນໄລຍະຫຼາຍປີທີ່ຜ່ານ ວັດໄດ້ຖືກໄຟໄໝ້ເປັນເວລາຫຼາຍຄັ້ງ. 

ດັ່ງນັ້ນ ຈຶ່ງເຮັດໃຫ້ໜັງສືໃບລານ ແລະ ເລື່ອງລາວຕ່າງໆພາຍໃນວັດ ຖືກໄຟໄໝ້ຈົນໝົດ. ຕໍ່ມາວັດສີບຸນເຮືອງ ໄດ້ຖືກສ້າງຂຶ້ນໃໝ່ໃນປີ 2010. ພະນອນທີ່ມີຄວາມຍາວ 6 ແມັດ ໄດ້ຖືກສ້າງສຳເລັດ. ຢູ່ໃນວັດແຫ່ງນັ້ນຍັງມີພະອົງໜຶ່ງຊື່ວ່າ: “ພະປັດຈານໃຈ” ເປັນພະພຸດທະຮູບ ທີ່ໄດ້ຖືກເກັບມ້ຽນໄວ້ເປັນຢ່າງດີ ຕັ້ງແຕ່ອາດີດເຖິງປະຈຸບັນ ເຊື່ອກັນວ່າ: ມີອາຍຸ 600  ກວ່າປີ, ປະຊາຊົນຊາວແຂວງໄຊຍະບູລີ ມີຄວາມເຊື່ອວ່າ: ພະອົງນີ້ເປັນພະທີ່ສັກສິດ; ເວລາມີການເດີນທາງຊາວພຸດ ໂດຍສະເພາະ ຊາວແຂວງໄຊຍະບູລີ ກໍ່ຈະໄປຂໍພອນ ເພື່ອໃຫ້ເພິ່ນ ປົກປັກສັກສາ ເດີນທາງດ້ວຍຄວາມປອດໄພ. ຖ້າທ່ານໄດ້ມາຢ້ຽມຢາມແຂວງໄຊຍະບູລີ ກໍ່ຂໍໃຫ້ທ່ານໄປກາບໄຫວ້ຂໍພອນ ເພື່ອຄວາມເປັນສິຣິມຸງຄຸນ. ທຸກມື້ຂຶ້ນ 13–15 ຄ່ຳ ຂອງເດືອນ 3 ລາວ ເຊິ່ງກົງກັບເດືອນ 2 ສາກົນ ຈະມີການຈັດງານບຸນພະເວດ (ແຫ່ຜີໂຂນ) ຂຶ້ນຢູ່ທີ່ວັດສີບຸນເຮືອງ ເຊ່ິ່ງຂະບວນແຫ່ຈະເລີ່ມຕັ້ງແຕ່ 4 ໂມງແລງ ຈາກປ່າຊ້າຈົນຮອດ 7 ໂມງແລງ ຂອງທຸກໆມື້. 

10. ທາດນາງສາມຜິວ. (ແຂວງໄຊຍະບູລີ)

​ທາດນາງສາມຜິວ ຕັ້ງຢູ່ບ້ານທາດ ເຂດເທດສະບານເມືອງທົ່ງມີໄຊ ແຂວງໄຊຍະບູລີ ນັກທ່ອງທ່ຽວສາມາດໄປທ່ຽວຊົມ ທາດນາງສາມຜິວ ໂດຍໃຊ້ທາງລົດ. ມີຕຳນານເລົ່າຂານກັນວ່າ: ເປັນເວລາດົນນານມາແລ້ວ ຢູ່ເມືອງແຫ່ງໜຶ່ງໃນແດນໃຕ້ (ຈຳປາສັກໃນປະຈຸບັນ), ມີສາວສະໜົມຄົນໜຶ່ງ ໄດ້ຕົກລົງປົງໃຈຮັກ ແລະ ໄດ້ແຕ່ງດອງກັບນາຍທະຫານ ທີ່ຮັບໃຊ້ພະຍາ. ຈາກນັ້ນ, ນາງກໍ່ໄດ້ຖືພາ 3 ເດືອນ, ສ່ວນຜູ້ເປັນຜົວ ກໍ່ໄດ້ໄປສູ້ຮົບກັບສັດຕູ ແລະ ໄດ້ເສຍຊີວິດຢູ່ສະໜາມຮົບ. ສ່ວນນາງກໍ່ໄດ້ກາຍເປັນໝ້າຍ ທີ່ຂາດບ່ອນເພິ່ງພາອາໄສ, ແຕ່ຍ້ອນພະຍາ ຄິດເຫັນຄຸນງາມຄວາມດີຂອງຜູ້ເປັນຜົວ ເພິ່ນຈິ່ງໄດ້ຮັບນາງໄວ້ລ້ຽງດູເບິ່ງແຍງ. ວັນເວລາໄດ້ຜ່ານໄປ 9 ເດືອນ, ນາງກໍ່ໄດ້ໃຫ້ກຳເນີດລູກຍິງ ທີ່ມີສຸຂະພາບແຂງແຮງ, ໜ້າຕາສວຍງາມ, ຄວາມງາມຂອງນາງໃນວັນໜຶ່ງໄດ້ປ່ຽນແປງຕາມຕອນ(ເຊົ້າ-ສວຍ-ແລງ), ເມື່ອນາງໃຫຍ່ເປັນສາວ ຄວາມງາມຂອງນາງ ຍິ່ງເຮັດໃຫ້ຊາວບ້ານຊາວເມືອງຕົກ